مدونة عمر كامل: "هتقدر تعيّش بنتى في المستوى ده؟"

مدونة عمر كامل: "هتقدر تعيّش بنتى في المستوى ده؟": جلس والد العروسة بألاطة وزير سابق واضعاً رجل على رجل ثم نظر لي بنظرة ملأها التحدي وسألني هذا السؤال الطبقي العنصري البغيض "هتقدر تعيش بنتي ف...

شهود ... ويبقى الله شهيداً

ضمينى خديني انا لاجئ ....


القاضي: نادي عالشاهد الاول
الشاهد الاول : ثانيه واحدة

القاضى: هيئة المحكمة بتنادى عليك تقول حاضر يا فندم
الشاهد: حاضر يا فندم

القاضي: اسمك ووظيفتك ؟
الشاهد: محسوبك خدام الباشا

القاضي: دا اسمك ولا شغلنتك ؟
الشاهد: لا يا فندم دا اسمي

القاضي: بتشتغل ايه ؟
الشاهد: عبد المامور

القاضي: انا عايز المهنة في البطاقة
الشاهد: اه ، كدا وكدا ... حاصل علي بكالوريوس علوم شرطية

القاضي: كنت فين فى الفترة من ٢٥ - ٢٨ يناير ؟
الشاهد: كنت فى خدمة الباشا

القاضي: هل جاتلك تعليمات بقتل المتظاهرين ؟
الشاهد: بص يا فندم ما حدش قتل الثوار احنا كنا بنلعب ..مآد فايت (اللي هيا حرب الطين) وبعدين فجاة واحد من السادة الظباط نشن على واحد وبعد ما الطلقة خرجت الواحد دا لف حضرتك فجت فى عينه

القاضي: هل كانت ذخيرة حيه ؟
الشاهد: ايوه يا فندم ... احنا كل انواع الطمي والطين اللي بنستخدمة في الماد فايت بيبقي حى وطازه ، الواد قفش وحلف لازم يضرب الظابط ده ... وقفشوا والهزار قلب بجد

القاضي: وضح يعني ايه الهزار قلب بجد ؟
الشاهد: انا اوضح لحضرتك احنا كنا مجموعتين ...مجموعه عند مبني وزارة الداخلية ودول كنا بنلعب مع الثوار مآد فايت والمجموعة التانية كانت في العباسية ودي كانوا بيلعبوا باينت بال (اللي هيا كرة الطلاء)

القاضي: امال قوات الامن اللي كانت علي كوبري قصر النيل ؟
الشاهد: دول يا فندم كانوا بيلعبوا بمسدسات المايه، بس الحق بتقال السيد مدير الامن قال اللي عايز يروح يعمل حسابه في حاجه ووتر بروف وطلب بصرف بنادول كولد اند فلو للناس اللي جالهم برد او نزلات شعبية ولم يفرق بين مواطن او ظابط شرطة

محامى المدعي بالحق المدني: امال مين اللي قتل الثوار ؟
الشاهد: انا اقول لحضرتك هما لما كسبوا كان في جايزة ماديه حاطاها الشركات الراعيه للثورة اللي هيا زي ما قال الفنان عمرو مصطفي (كوكاكولا، فودافون، بيبسي) فالثوار هما و الجواسيس اللي كانت بعتاهم ايران (اللي كشفهم بردك الفنان عمرو مصطفي) اختلفوا وحاول وائل غنيم الماسوني (زي ما فضحوا الاستاذ احمد سبايدر) فالموضوع كبر فكل واحد جاب ناس والحوار ما اتلمش عشان السادة الضباط كانوا لسه بيغيروا وبالامانه مدير الامن كان بيبكتهم في غرفة العمليات قصدي خلع الملابس عشان خسروا بفضيحة

محامي الدفاع: هل تعلم اين كان حبيب العادلي في هذا الوقت ؟
الشاهد: ايوه كان في المقر الخاص بيه لابس البُرنس الاحمر وكان بياخد دش سخن من سخانه الاولمبيك ال٢٥ لتر ... ودا مثبت في الفحص الفني للسخان

عضو هيئة قضايا الدولة : انت حالف اليمين ولازم تقول الحق ايه اللى حصل يوم ٢٨ يناير ؟
الشاهد: حضرتك تقصد انهى يمين ؟
لو حضرتك تقصد القسم بتاع الشرطة واني ادافع عن الوطن ... ايه يا بيه الكلام دا انا من اول ما اتعينت وانا ما ليش دعوة بوطن ولا مصالحه انا وطني هوا الباشا وعشان كدا غيرت اسمي لخدام الباشا والمهنة لعبد المامور
انا لو بتكلم علي محكمة وكدا فانا اصلاً ما قولتش القسم ...وحتي لو قلته فى حد يقطع عيشه بايديه ... يا بيه انا لو الباشا حصله حاجة انا هتشرد انا وعيالى ... يا سيادة القاضى انا ما بعرفش اعمل حاجة في جهاز الشرطة غير خدمة الباشا ..عايزني اسجنه بايديا ... وهوا اللي كان فاتحلي شاليهو في مارينا .. وخيره عليه انا وعيالي

******** تصفيق حاد ********** تنزل الستار



انا أري انه مهما شهد الشهود او غيروا من اقوالهم فالحق هو الحقيقة والباقي كله فى الزباله ... وربنا في يوم هيظهر الحق حتى لو كان على رقبة مين 





اهداء خاص الى جهاز الشرطة 

"ياراجل دا انا مستنى نص فرصة عشان اشترى نفسى " 

ايها الاخوة المواطنون

اوجه كلامى الجميل دا لاخواني المواطنين البنات منهم و البنين وتحديداً اللي بيشتغلوا 
واستأذنكم هستثنى موظفى القطاع العام عشان دول بتتلاوهم الحكومة بعد ربنا طبعاً 
اصل دول لا مؤاخذة عاملين زي اليتيم المعاق .... الحكومة بتدورلوا على حد يتبناه 
عشان يا يكفر بيه عن ذنوبه او يشغله (يشحت بيه) 


طيب .... نبدا من اول اليوم كدا وعايزك تركز معايا 
مرواحك الشغل مش معناه انك بتشتغل .... امال ايه ، ايميلاتك هيا اللى معناها انك بتشتغل 


لو قرفان م الشغل  حاول تدور علي حاجة تشجعك ع الشغل 
يعني مثلا علق علي مكتبك جمل حماسية زي "هذا الوطن يستحق العمل من اجله" او "احنا بنعمل كل دا عشان مصر" 
بس ما تنساش تكتب في الهامش تحتها "مصر هيا اللي بتدفع يا رأفت" "هوا اللى بيروح عند الحكومة بيرجع" 




عندما يبدأ مديرك يتحدث عن "احنا مش بنستخدم سياسة الثواب والعقاب" تفهم من كدا حاجتين 
اول حاجة: ان اصلا ما فيش ثواب من اساسه 
عملت شغلك وماله ما كل الناس بتعمل شغلها، عملت زيادة عن شغلك حبيتين ... وماله ... عايز ايه ! مكافاه ؟ ... ماشي يا سيدى "شكراً" ...ايه رأيك بقى في المكافاة دي !! .... اُمال، انت مش بتشوف اعلان فودافون ولا ايه ...اما امرك عجيب يا جدع 
تاني حاجة: ان ما فيش نظام عقاب بردك !!!  ... اُمال ...سواني بس اتقل عليه لحظة ... ايوا ما فيش نظام عقاب لان اصلا شغلك هيعمل معاك الصح ...هيكفرك ويطلع ايمانك ... هوا في حد ذاته هيبقي عقابك 


لو لقيت مديرك مش بيخصم منك وبـيـبـعزقلك مرتبك زي مراتك ما بتعمل معاك في كارفور ... يبقي تفهم من كدا ايه 
ان طول ما هوا مش في ايده خصومات ...يبقي ما فيش في ايده مكافات 
وساعتها دور ع المفتاح ... بس افتكر ان اللي بيجيب العصاية للمدرس هوا اول  واحد بيتضرب بيها 


لو مديرك حاول يقنعك انه مش بيحب يمارس سلطاته كمدير وانه بيعاملكم "صحاب في بعضينا" 
فتاكد ان هوا مش شايف نفسه مدير عليك او مش واثق من نفسه ... لان المديرين بيحبوا المريسه ... وساعتها اقلبه بدري بدري عشان دا مش هيطلعك من تحت ايده .... لان زمايل المدير دا مش شايفينوا مدير فبيـزبلوه .... وما تحاولش تاخد مكانه ... هما سايبينوا عشان المكان دا بيمشي كدا 


لو سمعت جملة "اوعي تفتح بقك في الحاجات دي ... هنا مش بنناقش المواضيع دي" ...يبقي انت ما لكش عيش هنا من اساسه ... عشان انت اصلا وصلت بدماغك لمواضيع الناس بتخاف تفكر فيها 


ما تحاولش تتمحلس لاصحاب المال ... شوف مين اللي معاه مفتاحهم ...هما في حد ذاتهم مش هيفرقوا معاك 


تعتمد كثير من الشركات انظمة الخصومات وسبحان الله بيسقطوا حكاية المكافات 
ما تفرجوها علينا زي ما ربنا فرجها عليكوا ... هتفضلوا توفروا لحد امتي 


عقود العمل بيبقي فيها جمل مستوحاة من فريد الديب المحامي الشهير 
زي مثلاً فى جزء المهام الوظيفية -دا اذا كنت قريت عقدك اصلاً- "المهام الوظيفية لفلان لا تقتصر على ولكن تشتمل علي" بجد والله والجملة الاشيك تلاقيها مضافه في الاخر "اي مهام اخري تتطلبها طبيعة العمل" ودي كانوا المفروض يزودوا بعدها "شبيكي لبيكي عبدك وبين ايديكي ... اؤمريني" 
وجرب كدا تردهالهم في المرتب وتضيف مثلا " الاجر المقابل لهذه المهام لا يقل عن" او "تضاف اي مصاريف اخري حسب احتياجات الموظف و عروض كارفور ودخلت المدارس ورمضان وكدا بقي" 


عزيزي المواطن لو شركتك بتدفعلك  مقابل شغلك جزء مادي وجزء معنوي ...فساعتها هل جزاء الاحسان الا الاحسان ...لازم انت كمان تعملهم الشغل جزء مادي وجزء معنوي 
يعني تخلص حاجات م اللى عليك وحبه هتبقى سعيد وكلنا هنتبسط لو خلص ... وليس كل ما يتمناه المرء يدرك والاعمال بالنيات ومن هم بحسنه ولم يعملها كتبت له حسنه 


اخي المواطن نييجي لجزئية التقييم الدوري 
فدي بتوصل لحاجتين 
الاولي انت كويس ... وكويس بس 
او انك مقصر وساعتها مش مقصر وبس دا لازم نتخذ اجراء وسريعاً 
اديلك مثال 
التقييم الدوري دا عامل زي الكشف الطبي الدوري اللي احنا مش متعودين عليه 
لو روحت وطلعت سليم هل الدكتور هيكتبلك دوا ابدا والله ... مع العلم ان هوا ممكن يضربلك اي نتيجة عشان يستنفع منك ...يعني هوا في حد هييجي يكشف وهوا مش عيان اكيد في حاجه غلط واحنا مش عارفين هيا ايه ... وما فيش حد كامل 
ولو طلعت عيان اكيد هيبدا يعالجك واول حاجة يمنعك من المخلل ويخصم منك عشان تبقي تاخد بالك وهكذا وانت عارف الباقي 




نيجي للارباح السنوية 
دي من عجائب الدنيا السبعه بنسمع عنها كتير بس مش كلنا بنروح الهرم ولا حتي عارفين نبني زيوا 
انا اسمع ان اللي بنوا الهرم خدوا شهرين (وباسوا ايديهم وش وضهر) انتوا تيجوا ايه جنب اللي بنوا الهرم 
ودي غالبا بتتحسب زي عروض المحمول و بتتطبق عليها سياسة الاستخدام العادل 


الشركة اللي بتتباهي بــبيئه العمل هيا مش عامله دا عشان سواد عيونك - لانك اصلا مش هتعرف تشتغل حاجه بعد الضهر- 
بيئه العمل دى معموله عشان لما الشغل يكتر كالعادة ومش لاحق تخلصه تتطبق في المكتب تعمله ... وساعتها تبقي بيئه العمل مناسبه انك تمدد او تغفلك حبتين او تطلب دليفري وتسخنه في الميكرويف وتعمل لنفسك كابتشينو بويش 
انما بيئه العمل دي ما بتدفعش مصاريف الباص ولا زيت العربية ولا حتي تبس السايس (الاجباري عملياً ، المراضيه نظرياً) 






دايما فكر مديرك بهذة الجملة 
عزيزي المدير "اذا دعتك قدرتك علي ظلم الناس. فتذكر قدرة الله عليك" 


انتهت 











جميع ابطال واحداث هذة الرواية من وحي خيال المؤلف وليس لها اي علاقه بالواقع واي تشابه بالواقع فهو محض الصدفه
البحته


والكلام دا مش بينطبق علي الشركات اللي استغلنا فيها لا سمح الله

انتوا عارفين عشان الاقي شغلانه جديدة فيها اد شهرين ...

خلوها علي الله والارزاق على ربنا




ضياء السادات
القاهرة في ١٣ اغسطس ٢٠١١
August 13 at 12:20am

القيادة المصرية

انا علي يقين تام ان القيادة المصرية هي الأصعب ... فهى لاتخضع لاية قواعد او قوانين بما فى ذلك قوانين الطبيعة بما فيها الجاذبية وخلافه 


لذلك احاول جاهداً حتى اكون سليم فى اختياري ان احلل القيادة في مصر 




بسم الله .... القيادة في مصر تشمل العديد من الانواع منها علي سبيل المثال لا الحصر : 


النوع الأول:

نوع يبقي دائما دائرة صنع القرار قريبة منه. فى حين يلقي نظرات خاطفه بين الحين و الآخر علي العلاقات الخارجية وأحيانا قد يتناسي الماضي ولا ينظر الي من هم خلفه . 
- ويعيبه انه يضطرب عندما يدخل احدهم في دائرة الضوء الخاصه به ، وقد يفقد تركيزه في الطريق امامه ليلتفت الي اشياء فرعيه وينشغل بتنظيم المرور ،ومين يعدي ومين يقف. 

النوع الثاني:

يستبيح الطريق ويغتصب  الحارات نهارا جهارا بل ويبرر كل تصرفاته من أجل نص جنية من ع الأرض . 
و يستعرض دائما إنجازاته بأن مش المهم انك توصل يابيه ... 
وبجح لدرجه أنه ممكن يبقى جاى  عكس على سرعة ويسبلك بالكلاكس عشان  مش بتوسعلوا 
- يمتاز بانه يعرف طبيعة القيادة في مصر ويديرها بحكمة فتجده بيهندل الملاكي و تعالى يا مدام و استني انت يا حمار انت واللي راكبك و تحت امرك الرخص اهيه يا باشا.

النوع الثالث:

لا بيقدم ولا يأخر ولكن عطسه منه توقف حال البلد ... وقد تصلك رساله او تاج علي تويتر "أتوبيس عطلان فى طلعة الدائرئ دور علي سكه  تأنيه " ... وقد تتبع "اي خدمه ظبطك في الدائري لو في حاجه ع المحور ما تنساناش" 

النوع الرابع:

نوع عاش فى الخليج أو أوربا وعارف فى قوانين المرور ولكنه لا يجد فى إى من تلك القوانين واللوائح والتشريعات  حاجه  بخصوص المطبات والحفر وخط المترو التالت و يجد صعوبه في استيعاب جملة اوعي تلبس المطب
- بيصعب عليه اوي لانه بيلبس الحزام وبيستعمل الاشارات في الطرق الداخليه وبالتالي بيكون صيد سهل لكل اللي سايقين في الشارع 

النوع الخامس:

نوع يرى أن طول ما بيرخصوا  عربيات جديدة المشكلة مش بتتحل ...  وولاد الكلب قال ايه بعد ثالث عربية ضريبة رفاهيه ... أنا لاقي أكل دا أنا وآخد قرض ومقسطهم 

النوع السادس:

نوع موسمى لا يظهر إلا في الشتاء ... وحاله يشبه كثيرا حال العمليه التعليمية ... وقوف متكرر .. والعيال مطلعه دماغها من الشبابيك عشان تأخذ شهادة عفوا طرأوة 

:::::::::::::::::::::::::


بم تفسر 


واحد قرر ياخد الشارع كله بضهره ؟ 
- اكيد نسي حاجه في البيت 
حارة شافط  فيها بطنك عشان تعدى وتتصدم بعربية نص نقل بتحمل جوا ؟
- اكيد شيفرولية الدبابة 

الشارع كله راجع بضهره  ؟

- قلقوا علي الراجل اللي خد الشارع بضهره ، او بيعيشوا المغامرة 

***********************

خلاصة القول

انا من اكثر المعجبين بمصطلح نبض الشارع .... فانا اري ان الشارع هوا نبض كل حاجة 

عشان كدا يوم ما تجرب القيادة في مصر ... وتلاقي ان فعلاً الشارع حاله اتعدل وبقي فيه نظام 

تاكد ان الثورة نجحت 

ميكى جيب

تعليقاً علي ما فعله ساويرس 


انا شايف (وانت مين عشان تشوف) 


ضياء السادات صاحب البلوج ان شاء الله 


اللى هوا عمله دا ازمه بدون لزمه .... كان بس محتاج لحظات يفكر قبل ما يعملش شير لاى حاجه 


Think Before You Share | Campaign


ردود فعل الناس .. هما احرار فيها ... كل واحد من حقه يفهم زي ما هوا عايز 




وبعدين هسآل الناس اللى بتقول انها بتدافع عن الاسلام ... هوا انتوا عارفين ان النصرانيه فيها لحيه بردوا ولا ايه ؟ 


انا مش عايز اعرف اذا كان هوا غلطان ولا لأ ... بس هل نشر صور بنشتم فيها نجيب ساويرس وبنتريق عليه هوا دا اللي هيرد حق الاسلام ... وهوا دا اللي علمهولنا الاسلام 


اننا نرد الاساءه بالاساءه .... اللي انا كنت اعرفه ان فى قصاص في القتل وبيبقي بعد ثبوت الجريمه وبحكم من القاضى 




والله اللي شايف ان الراجل اساء للاسلام ممكن يقاضيه ويطلب في عريضة دعواه ما يحلوا له ... وممكن يطالب كمان انهم يوقفوا شركات موبينيل و لينك دوت نت لان صاحبها يسئ للاسلام 


واعتقد ان القضاء يرفع شعار "واذا حكمتم بين الناس ان تحكموا بالعدل" ... والعدل هوا شرع الله 


وما فيش حاجه فى شرع الله بتطالبنا اننا نسئ الي من اساء الي الاسلام 


يقول الله فى سورة الانعام ايه ١٠٨ 


ولا تسبوا الذين يدعون من دون الله فيسبوا الله عدوا بغير علم 


ولم اعرف شيئا عن النبى انه كان يسب كفار مكه (لو حد يعرف يعرفني) 




الدفاع عن الاسلام لا يكون الا بالاسلام  

جآى أتقدم

كثيراً ما نستخدم كلمات فى غير محلها 


على سبيل المثال تشتهر كلمة "روحت اتقدم" بانك روحت تخطب ، تقرا فاتحة حسب انت تعرف البنت بقالك اد ايه .... قصدي حسب تقاليد منطقتكم ... المهم ان هيا حاجة مرتبطه بالجواز 


فى حين ان القعدة بتبقي اشبه بقعده مفتش الضرائب وفيها بتبدا تتكلم عن الاصول الثابته ودي بتختلف من حد للتاني فممكن حد يبقي بيقول عربيه وشقه و حد بيزود هيدفع كام مهر و حد بيتكلم في هيعمل فرح بكام وفي حد بيتكلم عن اليخت بتاعه و المحرمات دي 


* للعلم في حد ممكن يحاول يتجاوز الاصول الثابته ويدخل ع النقطه الجايه 


وبعد كدا بتبدا تتطرق للاصول المتغيره من مرتب او مصروف او كما يقال بيعمل كام في الشهر - متوسط انتاج الراجل / الشهر - ودي بتبقي حسب الفصيله و نوعيه المزرعه اللي متربي فيها 


** هناك من يتجاهل النقطتين ودا بيبقي بيتناقش في


وهوا من قالك انك رايح تتقدم دا انت رايح تفلس .. رايح تصفي حساب ... هتخلص في عروسة ... سميها زي ما تسميها 


يا عم انت متشائم ليه ... الموضوع سهل ... انت بس اللي مكبره 


سهل مقارنة بايه ؟ دا انت لو روحت اي حته في الدنيا هتلاقي الجواز بالساهل 


فين يعني ؟ 


عندك لبنان ، الحياة اخر حلاوة وهما اصلاً مش بيفكروا في الجواز  ... بقول دول عندهم الحياة حلوة 


انت اصلاً روحت لبنان !!!


لا طبعاً ... وبعدين ايه الذكاء ده ... ما لو انا روحت لبنان يبقي انت اكيد روحت لبنان 


صحيح !!!




بص ... هوا موضوع الجواز دا موضوع ما حدش عرف يوصل فيه لخلاصة زي اكل العيش بالظبط


تلاقي ناس قرفانه ويقولك "اكل العيش مر" 


وحد تاني يقولك "ادينا بناكل عيش" 


وممكن تكتشف ان في ناس الحافز بالنسبالها هوا اكل العيش فيقولك "يا عم كل عيش" 


هكذا الجواز في اللي يقولك "كاس كلنا شاربين منه" ... طاب وعلى ايه انا عمري ما دخنت هآجي على اخر الزمن وابقي بتاع كاس ...لا ياعم حد الله بيني وبين الحرام 


وحد يقولك "احلي حاجة في الجواز الخِلفه" ... وفي نفس القعده تلاقي متجوز تاني يقولك "انا هخلف وكمان أربي" 


ايوا يعني هيا الخلفه اللي حلوه والتربيه زباله مش فاهم ... وعلي ايه ...ما انا اروح قدام مستشفي غمره للولادة واقعد اتفرج علي عمليات ولاده اتكيف واروح بيتنا 


بص بردوا انت عارف ان الحاجة الوحيدة اللي ثابته هيا التغيير  .... فلو ما اتقدمتش هتتاخر 


بص الواقع بيقول ان كل الي بيتقدموا بيتاخروا 


انت شايف ان  الافضل تتاخر وانت في مكانك ... ولا تتقدم وترجع تتاخر فترجع تاني مكانك 


امممم عندك حق .... بس انا عشان اتقدم لازم ابقي جاهز وابقي كويس واستحق اني اتقدم 


لا في الحته دي ما تقلقش ... الجواز في الموضوع دي مدرستين 


مدرسة القطاع الخاص ...ودي احيانا بيطلق عليها عريس كويس ...ففي عوامل كتير بتدخل في التقييم ...


ومدرسة القطاع العام ... ودي بيطلق عليها عريس جاهز ... ودي مش بتتدي اولويه غير للاقدميه بالتوافق مع مدي الجاهزيه 


طيب ما فيش مدرسة لغات ؟


في طبعاً ... بس ساعتها بتدفع مصاريف اعلي وبيبقي اسمه ويدنج مش فرح وبتختلف المسميات في حاجات كتير 




طيب بص انا عايز ابقي عريس كويس جاهز ؟! 


انت هتكفر بالله ولا ايه ... يا ابني المعجزات انتهت بنهاية عهد الانبياء .... قوم اتوضا وصليلك ركعتين واستغفر ربنا علي اللي انت بتقوله دا 

مواصفات ***** المثالى

انت هتعمل عليه راجل ؟! 
لا خالص ... انا مش عارف اعمل راجل ازاى ؟! 
ــــــــــــــــــــ




وبدأت افكر مع حالى هوا ازاي تعمل راجل ... طيب هل انت محتاج تعمل راجل 


لا خالص ... الحمد لله الدوله معترفه بذكورتي ... والمجلس الاعلي للقوات المسلحه لم يذكر انه هيكشف عن ذكوره اي واحد مكتوب في بطاقته ذكر 


بس انا عارف ان الذكوره مش مقياس الرجوله .... طيب يبقي ايه  هيا مقاييس الرجوله 
بص الطول فوق متر و سبعين وعرض الصدر مش فاكر كام 
انت مين اللي قالك كدا 
يا عم ما هيا دي مواصفات الكليات العسكرية  ... مش الجيش للرجاله 
طاب ما الكليه الجويه بتاخد اقل من متر وسبعين ... دول مش رجاله 




اممممم 


طيب اسالك ... هوا ليه الراجل لو راجل عمل عليه راجل بيتضايق؟! 
عشان هوا ماتنفعش تعمل راجل على راجل ؟ 
امال اعمل راجل على مين ؟ 
اعمل راجل علي الست ؟ 
انا مش مقتنع بس خليني معاك ... طيب ازاي اعمل راجل علي الست ؟ 


 *اول حاجه تحتويها 
- عارفها دي اخدها تحت جناحي .... بشفهم في الفسطاط 
* جناح ايه ... تحتويها يعني تبقي ............ بص دي حاجه مش بتتشرح 
-طيب ارسمها 
* بص اقولك ... م الاخر لو جيت تاخدها تحت جناحك وشالت دراعك يبقي هيا مش حاسه انها لما تبقي تحت جناحك بالآمان .
- شفت ازاي يبقي الجيش عنده حق ... الطول ومقاس الصدر هما دول مقياس الرجوله 
* يا عم دا كان تشبيه ... انها تحس ان اللي هيا عايزاه موجود عندك  
- دا علي اساس اني كارفور 
* كارفور ايه ياد يا مع****
- بهزر انا فاهم انت تقصد ايه ... يعني نخش اي حته اللي تعوزوا اشتريهولها 
* انت يبني مجنون .... هيا كل حاجه ماديه كدا عندك
- طيب معلش  ... اصل انا لما قعدت مع باباها قالي انت عارف طبعاً ان اي راجل لازم يبقي قادر يفتح بيت 
هوا صحيح يعني ايه يفتح بيت ؟ 


يفتح بيت يا سيدي ... انك تبقي قادر تصرف ع البيت وتوفر احتياجاته 
ـ شفت اديك قلت اصرف ع البيت ... الموضوع مرتبط بالفلوس 
* يخرب بيت اللي طلعك م الفانوس ...انت غريب اوي 
-  والله انا مش غريب ... انا عايز ابقي راجل 
* ما الرجوله عمرها ما كانت بالجسم ولا العضلات 
- طاب ما تقولي الرجوله بايه ؟


الرجوله ياسيدى 
- انك تبقي تقيل كدا .... عشان الستات تقول عليك مغرور 
- انك تبقي مالي عنيها ... عشان الستات تقول عليك قوي الشخصية 
- انك تبقي مسيطر كدا .... عشان تقول عليك انك مسئول ويعتمد عليك 




هيا دي الرجوله!! ... انت بتخرف يا عم .... انت بتقولي اي كلام ... انت متخلف علي فكره
* طيب يالا ياد منها ...بدل ما امد ايدي عليك 
- انت هتعمل فيها راجل ...كتك نيله 












* للحديث بقية